Şahmayının latınca adı Chalcalburmis chalcoides balığıdır. Xəzər dənizinin əsasən cənubi-qərb hissəsində sahildən 3-5 km aralı, 30 m-dək dərinlikdə yaşayır. Şahmayı keçici balıqdır, noyabrın əvvəllərində kürü tökmək üçün Kür çayına girir. Maraqlıdır ki, suda temperatur aşağı düşdükcə şahmayının çaya girməsi sürətlənir. Belə ki, suda temperatur 12°C olduqda çaya girmə başlayırsa, 10°C-də maksimum həddə çatır, 8°C-də prosses başa çatır. Bədəni uzunsov, yanlarından azacıq basıq, parlaq və başı kiçikdir. Həddindən artıq yağlı və dadlı balıq növüdür. Uzunluğu 20-40 sm, kütləsi 150-180 qramdır. 5 il yaşayır. Şahmayı balığının faydaları da çoxdur. Bu balıq vitaminlər, mikro və makro elementlər zülallar və yağlarla zəngindir. Şahmayı təzə, dondurulmuş və hisə verilmiş halda emal və istehlak olunur.
