Xəzər dənizində, duzsuz və az duzlu suda yaşayan balıqdır. İl ərzində Orta və Cənubi Xəzərin qərb sahili boyu 9-24 m dərinliklər kütümün ən çox yayıldığı zonalardır. Daim dənizdə yaşayır, kürü tökmək üçün şirin sulara girirlər. Yumurtlamağa təxminən mart və aprel aylarının ortalarından başlayırlar. Bu balıq növünün maksimum yaşı 11 ildir. Dişi növləri erkək növlərindən daha böyükdür. Bu balıqların əsl dişləri yoxdur və yeməyi faringeal dişlərlə əzirlər. Dənizdə yaşayan canlılarla, əsasən ilbiz, yengəc, krevetka və s. ilə qidalanırlar. Kütüm Cənubi və Orta Xəzərdə qiymətli vətəgə əhəmiyyətli balıqdır. Azərbaycanın və İranın Xəzər sahillərində tutulur. Balığın əti və kürüsü delikates hesab olunur. Təzə, dondurulmuş və hisə verilmiş halda emal olunur.
